一身「皮氣」鼓起志氣 夕陽工業變革開闢新出路

瑞興皮廠 – 白浩謙 ( Kean )

歲月何止不留人,亦令好多傳統行業萎縮,就好似擁有30幾年歷史嘅瑞興皮廠,喺上世紀嘅80、90年代風光一時,可惜今時今日皮革製造業喺香港已經變成夕陽工業。Kean係瑞興皮廠嘅第三代接班人,佢接手嗰刻,絕對唔係「老豆剩落大把」畀佢慢慢玩,而係連佢阿爸都想就此結束呢盤不斷式微嘅家族生意。但喺皮廠長大嘅Kean,卻沾染咗一種倔強嘅「牛脾氣」,唔想皮廠就咁玩完。但始終喺香港,生產皮革已經唔再係一條搵錢嘅康莊大道,唯一可以做嘅就係變革,Kean嘅求生招式唔係靠減價喺市場上委屈求全,而係靠生產樹膏皮,同時創立自家品牌,開拓產品銷售渠道。90後嘅佢胸懷大志,力求打破「富不過三代」呢個魔咒。

受訪者簡介:
白浩謙(Kean),瑞興皮廠第三代接班人及The Lederer創辦人
Kean當年10幾歲就開始喺屋企嘅皮廠幫手,佢冇因此嫌棄呢間被列為污染行業嘅皮廠,反而培養咗一份深厚感情。2014年佢喺外國讀完書返嚟,見到香港嘅皮革製造業一片暗淡,皮廠嘅生意額又不斷下跌,要喺一係做、一係唔做呢個局面上抉擇,佢選擇咗前者,一來想守護呢個家族事業,二來唔想父母面對皮廠結業而變得無所事事。男人嘅嘢都真係話變就變,Kean逐步為皮廠帶來變革,又創立自家品牌The Lederer。佢相信只要勤力及識得善用家族喺皮革業嘅人脈網絡,唔單止可以令皮廠生意起死回生,亦可以延續香港嘅皮革製造業。

https://www.munroads.com/p/1698/channel/entrepreneur/一身「皮氣+」鼓起志氣+夕陽工業變革開闢新出路